2 Samuel 3

Masaimo tu kasirarianna rapunna Saul na rapunna Daud, apa samasai-sainna samatoto’-toto’na tu Daud, na iatu rapunna Saul samoro’-moro’na.

Dio Hebron dadimi tu ba’tu pira-pira muane anakna Daud: iatu pa’bunga’na disanga Amnon, nadadian Ahinoam, to Yizreel.

Iatu ma’penduanna disanga Kileab, nadadian Abigail, pura bainena Nabal, to Karmel, na iatu ma’pentallunna disanga Absalom, nadadian Maakha, anakna Talmai, datu Gesur;

anna iatu ma’penna’pa’na Adonia, anakna Hagit; na ma’pellimanna Sefaca, anakna Abital,

anna iatu ma’pennannanna Yitream, anakna Egla, bainena Daud. Mintu’nate napadadian Daud dio Hebron.

Iatonna rarinna rapunna Saul na rapunna Daud, ullolongan kakuasan kapua tu Abner lan banuanna Saul.

Iato dolona den tu gundi’na Saul, disanga Rizpa, anakna Aya; ma’kadami (Ishboset) lako Abner, nakua: Ma’apai ammu sangampa’ tu gundi’na ambe’ku?

Lendu’mi naposengkena Abner tu kadanna Ishboset; anna ma’kada nakua: Ulu asura’ka te, angku la sanginaara to Yehuda? Iate ba’tu pirang allo umpogau’na’ kameloan lako bati’na Saul, ambe’mi, sia lako mintu’ siulu’na sia sangmanena, sia kukampaikomi anna tae’ mitobang tama limanna Daud, moi nasusito mipasala dukana’ belanna diona misa’ baine.

Nasanggangimira Puang Matua tu Abner, sia la Narangnganni pole’pa, ke tae’i nasusi tu Naallu’na PUANG lako Daud Napalaoi sumpa, susi dukamo la kupogau’ undinna:

Iamotu la unnalai tu kadatuan dio mai bati’na Saul sia umpabendan isungan kapayunganna Daud lako to Israel sia lako to Yehuda randuk dio mai Dan sae lako Bersyeba!

Moi sangbuku kada tae’ duka napebalii Ishboset lako Abner, belanna nakataku’.

Nasuami Abner tu ba’tu pira-pira sumbungan puduk lako Daud dio inanna, anna ma’kada nakua: Mindara puangna te tondok iate? Sia nakuapa: La sibasseki’, kumua la kusande’komi umpalulakoi kalemi tu mintu’ to Israel.

Ma’kadami nakua: Melo, ke sibasseki’, apa den misa’ kutuntun lako kalemu: iamotu tae’ muma’din ussitiroanna’, ke tae’pi mupesuanni dolo ussolanni lako kaleku tu Mikhal, anakna baine Saul, mumane sae umpessitiroina’.

Sia nasuapa Daud tu ba’tu pira-pira sumbungan puduk lako Ishboset, anakna Saul, nakua: Benna’ tu Mikhal, baineku, tu kulolongan belanna saratu’ kuli’ salepe’ kamuaneanna to Filistin.

Nasuami Ishboset tu tau male unnalai dio mai muanena, iamotu Paltiel, anakna Lais.

Situru’mi muanena anna tumangi’ undi dio boko’na sae lako Bahurim: nakuami Abner lako: Mallaiko, sule bangmoko. Sulemi.

Sipa’kadami Abner tu mintu’ pekaamberan to Israel, nakua: Masaimo mianga’ tu Daud la dadi datummi.

Totemo pasundunmi tu pa’poraiammi, belanna susite tu kadanNa PUANG diona Daud, nakua: Tete dio limanna Daud, taungKu, angKu rampananni tu to Israel, taungKu, lan mai limanna to Filistin sia lan mai limanna mintu’ ualinna.

Sia sipa’kada duka Abner tu mintu’ to Benyamin; male dukapa tu Abner lako Hebron umpokadai lako Daud tu mintu’ apa nasanga to Israel melo sia mintu’ rapunna Benyamin.

Saemi tu Abner mennolo lako Daud dio Hebron sola tau duangpulo; natoratumi Daud tu Abner sia iatu mintu’ tau nasolan.

Ma’kadami Abner lako Daud, nakua: Totemo la malemo’ urrampunni tu mintu’ to Israel lako puangku datu, anna sibasse puangku tu mintu’ tau iato mai sia ammi parentai tu mintu’ apa nakalo’ penaammi. Mangkato messimanmi tu Abner lako Daud, anna male marampa’.

Ta’kala sulemi tu surodadunna Daud sola Yoab dio mai kasirarian pangrampan, umbaa pangrampa buda. Iatu Abner tae’mo nadio Hebron, sola Daud belanna naeloran marampa’mo male.

Tonna rampomo tu Yoab sola tu mintu’ surodadu nasolan, napokadammi tau Yoab, nakua: Saemo tu Abner, anakna Ner, mennolo lako datu, apa naeloran marampa’mo male.

Malemi tu Yoab mennolo lako datu, nakua: Matumbari te penggaurammi? Saemo tu Abner mennolo lako puang, ma’apai ammi eloranni male, natang diapa-apa?

Mitandai duka tu diona Abner, anakna Ner, kumua sae la untanannikomi poya, la unnissanni tu lu tama lu lanmi mai sia iatu mintu’ apa napogau’pa puangku.

Tassu’mi tu Yoab dio mai olona Daud, nasuai tau unnula’i tu Abner, anna solanni sule dio mai limbong Sira, apa moi misa’ tu iannato tae’ naissanni Daud.

Iatonna sulemo tu Abner lako Hebron, napasepang senga’mi Yoab dio tangnga babangan tondok la sipa’kada buni, narokki tu tambukna, anna mate, belanna la umpebalaran Asael, adinna.

Undinnato narangimi Daud tu iannate, anna ma’kada nakua: Masero pindanna’ aku sola kadatuangku dio oloNa PUANG tontong sae lakona dio mai rarana Abner, anakna Ner.

Iatu rara iato nata’pa daomora ulunna Yoab sia mintu’ rapunna. Lan banuanna Yoab tang la ka’tu tau nakasunni rara sia golenan sia kupi’ anna ma’tekken sia nakande pa’dang sia karorian.

Iatu Yoab sola Abisai, adinna, umpatei Abner, belanna napatei Abner tu Asael lan kasirarian dio Gibeon.

Ma’kadami Daud lako Yoab sia lako mintu’ to nasikandappiran, nakua: Serekki tu pakeammi sia ma’pakean karoro’komi sia lumingkakomi dolo umbatingi batang rabukna Abner. Sia datu Daud kalena duka undi unturu’i tu bulleanna.

Iatonna lamunmi tau tu Abner dio Hebron, unnurruk-urrukmi tu datu dao panglamunanna sia iatu mintu’ to buda tumangi’ duka.

Nasa’burammi datu misa’ bating tu Abner, nakua: Sipaturaka tu Abner mate susi kamateanna misa’ to baga?

Iatu limammu tae’ bangpa nadipungo, sia iatu lentekmu tae’pa nadipumpung rante tambaga. Susitu katobanganna tau napobua’ to bulituk, susi dukamoto tu katobangammu. Attu iato mintu’ tu to buda samandu-mandunna untangi’i.

Mangkato saemi tu to buda umpalakui lako Daud la kumande tonna masiang siapa, apa umpalao sumpa tu Daud anna ma’kada: Nasanggangimora’ Puang Matua sia la Narangnganni pole’pa, ke la ullepa’na’ roti ba’tu apa-apa senga’, ke tae’pi nalambun allo.

Iatonna issanmi to buda tu iannate, natongannimi, susi dukato tu mintu’ apa napogau’ datu natonganni mintu’ to buda.

Allo ia dukato naissanmi mintu’ to buda sia mintu’ to Israel, kumua iatu Abner, anakna Ner, dipatei tangia pesuanna datu.

Mangkato nakuami datu lako mintu’ to mase’ponna: Tae’raka miissanni, kumua allo iate tibambang misa’ arung iamo misa’ to kapua lan lu to Israel?

Apa totemo malamma’ siapa’ akute, moi angku ditokko dadi datu; tau iato, iamotu anakna Zeruya, mandu masa’ga’ na aku. Na PUANGmora umpakkanni tu to kadake sitinaya kakadakeanna.